Лібералізм, забойствы і аборты

[kong_en_ge]

Не магу не вынесці з каментаў:

Чаму я не ліберал
palivac: Бо не даганяю, чаму лібералы патрабуюць захоўваць жыццё педафілам і серыйным забойцам, а вось ненароджаным дзецям у праве на жыццё адмаўляюць.
kong_en_ge: Вы прапануеце замест абортаў пажыццёвае заключэнне для немаўлятаў, як гэта робяць лібералы адносна забойцаў?

Перфразуючы вядомую фразу Хічкока, я не супраць хрысціянскіх каштоўнасцяў -- я проста іх баюся.

Comments

[silverrebel.livejournal.com]

Баішся забароны на аборты?
Дарэчы, АГЛ сваёй мудрай палітыкай справакаваў рост абортаў/забойстваў нованароджаных апошнім часам.

[kong-en-ge.livejournal.com]

> Баішся забароны на аборты?
Не баюся, але буду супраць такой забароны.

[kanaj.livejournal.com]

Я так і не зразумеў пазыцыі. Скажам, я супраць сьмяротнага пакараньня і супраць абортаў, дык хто я тады?

[kurt-bielarus.livejournal.com]

Амаль хто заўгодна :) Хіба што толькі ня эўрапейскі левы, бо яны звыйчана лічаць аборт "правам жанчыны".

[kanaj.livejournal.com]

Жах нейкі. Я магу доўга і многа пра гэта пісаць, і калі-небудзь зраблю гэта, проста для сябе.
Права на забойства... Жывем у нейкім "пераствораным сусьвеце"

[kurt-bielarus.livejournal.com]

Незразумелая лёгіка.

[kong-en-ge.livejournal.com]

Адмаўленне смяротнага пакарання мае сваёй мэтаю не абарону права злачынцы на жыццё, а рэалізацыю права на выпраўленне судовай і следчай памылкі. Кошт, які сплачвае грамадства за пажыццёвае ўтрыманне ў няволі, не такі ўжо і высокі, калі параўноўваць яго з коштам жыцця.

Што ж тычыцца права на аборты, дык не варта лезці ў тую сферу, якую не здольныя кантраляваць. Пакуль жанчына носіць каго пад сэрцам, яна і толькі яна мае права вырашаць, што з гэтым рабіць. Пазбаўленне гэтага права можа мець месца хіба што з моманту, калі б штучныя роды прывялі да нараджэння жыццяздольнага плоду -- тут ужо справа дзяржавы/грамадства: жадаеце ўтрымліваць -- утрымлівайце за свой кошт. А спажывецкі светапогляд на жанчыну, як на інкубатар прапагандуйце, але не навязвайце.

[kong-en-ge.livejournal.com]

> На падтрымку маці-адзіночкі грамацтва губляе шчэ менш, чым на пажыцьцёвае ўтрыманьне забойцы
Вось таму аборты і папулярныя, што на грамадскую падтрымку хера пражывеш. А ўтрыманне 200 "пажыццёўнікаў" значна таннейшае за натоўп "адзіночак".

> То бок з пункту гледжаньня новага гуманізму жыцьцё ката важней за жыцьцё чалавека.
Не варта блытаць тэзісы. Ці параўноўвай аборт з правам коткі на забойства ўласных кацянят, ці абмяркоўвай права кожнага члена грамадства, ад якога залежыць цяжарная жанчына, адмоўна вырашаць пытанне ейнага дзіцяці на жыццё.

[abc-in-lj.livejournal.com]

>Пакуль жанчына носіць каго пад сэрцам, яна і толькі яна мае права вырашаць, што з гэтым рабіць.
>Пазбаўленне гэтага права можа мець месца хіба што з моманту, калі б штучныя роды прывялі да нараджэння
>жыццяздольнага плоду

А зь якога месца тут пачынаецца лёгіка? Што ў дадзеным выпадку пазбаўляе чалавека права на жыцьцё: няздольнасьць да самастойнага выжываньня? Плаваньне ў пляцэнтарнай вадкасьці?

[kong-en-ge.livejournal.com]

> Што ў дадзеным выпадку пазбаўляе чалавека права на жыцьцё: няздольнасьць да самастойнага выжываньня?
Залежнасць ад іншага фактару, які грамадства не можа ўзяць на сябе: вынасіць плод можа толькі тая, у якой ён з'явіўся, таму ёйнае жаданне ці нежаданне будзе законам ў дадзеным выпадку.

[abc-in-lj.livejournal.com]

Дык гэта вы гаворыце пра магчымасьці, а правы - гэта ўсё ж ня тое ж самае.

Калі выграмадзянін Х. будзе тануць пасярод Нарачы, а я побач буду лавіць вангораў на сваім чоўне, дык я буду адзіным чалавекам здольным забясьпечыць памянёнаму грамадзяніну жыцьцё. І з гледзішча практычнага буду мець роўную магчымасьць працягнуць яму руку альбо плюнуць на макаўку. Аднак, грамадзтва проста такі душыць мяне законам "Пра неаказаньне неабходнай дапамогі". З той жа лёгікі, гэта спажывецкі погляд на мяне.

[kong-en-ge.livejournal.com]

Памер той самай неабходнай дапамогі ў дадзеным выпадку досыць малы ў параўнанні з магчымым наступствам у выглядзе смерці. Ніхто не прыцягне да адказнасці за адмову лезці ў проруб дзеля ратавання.

А тое, як пурытанскае грамадства зацікаўленае ў ратаванні жыцця ненароджаных дзяцей, добра бачна праз памер грашовай дапамогі бацькам дзяцей. Тая ж самая аналогія з ратаваннем на вадзе: супамернасць чаканняў і магчымасцяў.

[abc-in-lj.livejournal.com]

>Памер той самай неабходнай дапамогі ў дадзеным выпадку досыць малы ў параўнанні з магчымым
>наступствам у выглядзе смерці. Ніхто не прыцягне да адказнасці за адмову лезці ў проруб
>дзеля ратавання.

Гэтаксама, у выпадку пагрозы жыцьцю маці аборт сапраўды можа быць неабходным злом. Калі вы гаварылі пра гэта - значыцца мы пагадзіліся. Аднак, відавочна, што гэта не азначае права на распараджэньне жыцьцём дзіцяці ў любым выпадку.

Другі абзац - offtopic, але ўсё ж зазначу, што памер грашовай дапамогі да пытаньня правоў мае дастаткова пэрпэндыкулярнае становішча, як і любая іншая льгота. Каб камусьці даць - трэба ў кагосьці забраць, кожны лібэрал мусіць гэта памятаць нароўні з кансэрватарам :)

[kong-en-ge.livejournal.com]

> Аднак, відавочна, што гэта не азначае права на распараджэньне жыцьцём дзіцяці ў любым выпадку
А з якога моманту пра плод мае сэнс размаўляць як пра дзіця? Пэўны кампраміс пунктаў гледжання тут непазбежны, бо інакш сітуацыя дойдзе да той кропкі, калі выкарыстанне сродкаў кантрацэпцыі прызнаюць генацыдам, як у вядомым анекдоце.

> памер грашовай дапамогі да пытаньня правоў мае дастаткова пэрпэндыкулярнае становішча
Гэта не ільгота -- гэта плата, якую грамадства гатова выдзяліць на забяспечанне свайго намеру не ставіць маці перад пытаннем "як пракарміць непажаданае дзіця".

[abc-in-lj.livejournal.com]

>А з якога моманту пра плод мае сэнс размаўляць як пра дзіця?
>Пэўны кампраміс пунктаў гледжання тут непазбежны

Так, па ўсім відаць гаворка можа весьціцся пра тэрмін ці стадыю фармаваньня, пачынаючы зь якой плод будзе лічыцца чалавекам. Але ж не пра права ўласнасьці на плод.

>Гэта не ільгота -- гэта плата, якую грамадства гатова выдзяліць на забяспечанне
>свайго намеру не ставіць маці перад пытаннем "як пракарміць непажаданае дзіця".

Не-а. Па-пераше, мне нічога не вядома пра такія намеры. У мяне, прынамсі, яго няма. Па-другое, у грамадзтва няма бюджэту. Магчыма вы мелі на ўвазе дзяржаву. Але і ў яе, папраўдзе, няма сваіх кішэняў, каб нешта камусьці выплочваць, яна бярэ грошы з кішэняў сваіх грамадзянаў. А ў іх таксама дзеці, і яны ядуць. Баюся, сэнс гэтага фэномэну ня зьменіцца, калі вы адмовіцеся называць гэта "льготамі".

P.S. Не магу не зазначыць, што ў самой фармулёўцы пытаньня "як пракарміць непажаданае дзіця" мне бачыцца нешта хібнае. Пажаданых дзяцей таксама кормяць :)

[kong-en-ge.livejournal.com]

> Па-пераше, мне нічога не вядома пра такія намеры.
А адкуль тады з'яўляюцца думкі пра забарону абортаў? Хто той дабрадзеяч, што падбухторвае да забароны? Няхай ён падзеліць утрыманне дзяцей матэрыяльна, а не бегае з сякерай адказнасці.

> Па-другое, у грамадзтва няма бюджэту. Магчыма вы мелі на ўвазе дзяржаву.
Калі грамадства саспявае да ціску на сваіх чальцоў, яно набывае рысы дзяржавы. Так ці інакш, але калі няма грошаў -- не варта і прэтэндаваць на нейкія спецыяльныя правілы.

> Пажаданых дзяцей таксама кормяць
Іх на тое і заводзяць між іншым! :)

[abc-in-lj.livejournal.com]

>А адкуль тады з'яўляюцца думкі пра забарону абортаў? Хто той дабрадзеяч, што
>падбухторвае да забароны? Няхай ён падзеліць утрыманне дзяцей матэрыяльна, а

А няма сувязі паміж гэтымі пытаньнямі. Ёсьць відавочная розьніца паміж "не забіць" і "заплаціць за пражываньне". Ваш падыход: калі ты ня хочаш, каб гэтага чалавека забілі ты абавязаны яго забясьпечваць да сьмерці. А гэты чалавек проста мае натуральнае права на жыцьцё, як і я.

>Так ці інакш, але калі няма грошаў -- не варта і прэтэндаваць на нейкія
>спецыяльныя правілы.
У прынцыпе, я ўжо сказаў гэта вышэй. Разумееце, гэта непараўнальныя катэгорыі: жыць галодным ці быць забітым не атрымаўшы ніводнага шанцу. Нават, калі голад сур'ёзны.

[palivac.livejournal.com]

"А адкуль тады з'яўляюцца думкі пра забарону абортаў?"

Выцякаюць з дзесяці запаветаў.

[kurt-bielarus.livejournal.com]

"Адмаўленне смяротнага пакарання мае сваёй мэтаю не абарону права злачынцы на жыццё, а рэалізацыю права на выпраўленне судовай і следчай памылкі"

"Што ж тычыцца права на аборты, дык не варта лезці ў тую сферу, якую не здольныя кантраляваць."

Калі забойствы дарослых ўсёроўна ёсьць - дык іх таксама легалізаваць?

"Пакуль жанчына носіць каго пад сэрцам, яна і толькі яна мае права вырашаць"

З чаго б гэта?

"А спажывецкі светапогляд на жанчыну, як на інкубатар прапагандуйце, але не навязвайце."

Ня трэба ярлыкоў. Моё сьветапогляд ня мае нічога агульнага з тым, што вы мне прыпісалі.

Мой сьветапогляд грунтуецца на ідэі АДКАЗНАСЬЦІ.

Даў жыцьцё новаму чалавеку - не забівай. Калі забіў - ты забойца чалавека.

[kong-en-ge.livejournal.com]

> Калі забойствы дарослых ўсёроўна ёсьць - дык іх таксама легалізаваць?
Супраць забойстваў сродкі ёсць -- праз тую ж ізаляцыю патэнцыйнай ахвяры ў бяспечным месцы. З ненароджаным дзіцём такая ізаляцыя немагчымая ў прынцыпе. Гэты фактар цалкам непадуласны маралізатарам -- вось на што я звяртаю ўвагу.

> З чаго б гэта?
З таго, што няма спосабу пазбавіць яе гэтага выбару праз забіранне плоду "на адказнае гадаванне".

> Даў жыцьцё новаму чалавеку - не забівай.
Я не ўхваляю аборты ў якасці сродка кантрацэпцыі, але не лічу неабходнай іхнюю забарону. Супраць народных сродкаў барацьбы з непажаданай цяжарнасцю ніводная забарона не выстаіць.

[kurt-bielarus.livejournal.com]

> Калі забойствы дарослых ўсёроўна ёсьць - дык іх таксама легалізаваць?
Супраць забойстваў сродкі ёсць -- праз тую ж ізаляцыю патэнцыйнай ахвяры ў бяспечным месцы.

Супраць забойстваў ненароджаных таксама ёсьць - праз прапаганду і пакараньне тых, чыя віна даказаная.

/З таго, што няма спосабу пазбавіць яе гэтага выбару праз забіранне плоду "на адказнае гадаванне".

Няма спосабу пазбавіць мяне выбару забіць кагосьці са знаёмых, калі ня ведаць пра мае намеры.

/Супраць народных сродкаў барацьбы з непажаданай цяжарнасцю ніводная забарона не выстаіць.

Не разумею, пра што размова.
Аборт - забойства, і павінна быць забароненым. Забойства ненароджаных, як і забойства народжаных цалкам ліквідаваць у любым выпадку немагчыма.